@roger_dsl · 留言「MD」完整做法

學 AI 唔使記：讓 AI 幫你記 🧠

6 個步驟＋3 個錦囊。做一次，之後 AI 自己記住你。

💡 點解要做？AI 對話一關就唔記得你，每次都要重新講自己做緊咩、鍾意點做。將你嘅資料同工作進度寫成 markdown（.md）檔，存喺自己電腦，AI 一讀就識你。
📝 AI 出嘅檔案入面會見到「#」號，嗰個係 markdown 嘅標題符號，正常㗎，唔使理。

6 個步驟

第 1 步

開一個專用嘅「記憶 folder」

點解：記憶放喺你自己電腦，先係屬於你。對話紀錄喺 AI 公司度，帳號有咩事就冇晒。

例如開一個叫 AI記憶 嘅 folder，下面幾步嘅檔案全部放入去。

第 2 步

叫 AI 寫一份「關於我」.md 檔

點解：你嘅工作、目標、習慣寫低一次，之後每次新對話都唔使再自我介紹。

喺你用開嘅 AI 貼呢段，存做 關於我.md。

總結一次你咁耐以嚟對我嘅認識，寫成一個 markdown 檔，分以下 6 個標題：
1. 我做咩工作（行業、職位、日常任務）
2. 我做過嘅重要項目同決定
3. 我嘅目標
4. 我嘅偏好同講嘢風格（鍾意點樣嘅答案、唔鍾意乜）
5. 我成日叫你做嘅嘢同常用做法
6. 重要背景資料（工具、流程）
只寫你真係知道嘅嘢，唔肯定嘅寫「待確認」，唔好估。
唔好寫入任何密碼、API key 或者客人個人資料。

第 3 步

每做完一件事，叫 AI 寫一份「交接筆記」

點解：做咗咩、做到邊、下一步係咩全部記低，下次 AI 讀返就識接手，唔使你由頭解釋。

做完一件事（或者每日收工）貼呢段，存入 交接筆記 folder。

幫我將我哋頭先做嘅嘢整理成一份交接筆記，寫成 markdown 檔。
檔名用「今日日期_主題」，例如 20261013_IG文案。
內容分以下 5 段：
1. 完成咗咩
2. 決定咗咩（同原因）
3. 未完成／卡住
4. 下一步第一件事
5. 要記低嘅新資料（我嘅偏好、工具設定等）
簡潔，每點一行。冇講過嘅唔好補。

第 4 步

一份筆記只記一件事，檔名加日期

點解：AI 搵資料會準好多，唔會將舊決定同新決定撈亂。有日期，AI 一睇就知邊份最新。

AI記憶/ ├── 關於我.md └── 交接筆記/ ├── 20261011_IG文案.md ├── 20261012_報價單.md └── 20261013_客人跟進.md

第 5 步

用 Obsidian 打開呢個 folder

點解：AI 記咗咩，你自己都睇得到、搜尋得到。記憶唔再係黑盒，記錯咗即刻見到、即刻改。

去 obsidian.md 下載（免費）
揀「Open folder as vault」，揀返第 1 步嗰個 AI記憶 folder
左邊就會見到全部筆記；右上角搜尋，一打字就搵到

第 6 步

開新對話，第一句叫 AI「先讀呢個 folder」

點解：.md 係普通文字檔，唔屬於任何一間公司。開新對話、換帳號，讀一次就即刻識你。

識讀電腦檔案嘅 AI（例如 Claude Code）：叫佢讀 folder 就得。網頁版：將 關於我.md 同最近 3 份交接筆記上載，再貼呢段：

以下係我嘅背景資料（關於我.md）同最近幾份交接筆記。
請先讀完，用 3 句話總結你對我同我而家進度嘅理解，等我確認冇錯先開始。
之後回答我嘅時候，跟返「關於我」入面嘅偏好同講嘢風格。

🎁 3 個錦囊

好多人做咗記憶，就係漏咗呢 3 樣

錦囊 1

API key 唔好交俾 AI，用 .env 存喺本機

點解：貼喺對話入面嘅 key，會留喺對話紀錄同 .md 檔。放喺本機 .env 檔，程式用嗰陣先讀，對話入面一個字都唔出現。

⚠️ 注意：識讀電腦檔案嘅 AI 一樣讀得到 .env，所以要叫佢守規矩。貼呢段俾佢：

以後我嘅 API key 同密碼，一律放喺本機嘅 .env 檔。請遵守以下 3 條規則：
1. 唔好讀取或者印出 .env 入面嘅內容
2. 寫程式要用 key 嘅時候，用環境變數讀取，唔好將 key 寫入程式或者 .md 檔
3. 如果我喺對話貼咗 key，即刻提我換一條新嘅
請將呢 3 條規則寫入你嘅長期規則或者記憶。

錦囊 2

Claude 帳號俾人 block 咗，記憶都用得返

點解：記憶喺你電腦嘅 Obsidian，唔喺 Claude 帳號入面。帳號冇咗，開返新帳號，用第 6 步嘅 prompt 一讀就識你。

⚠️ 要知：帳號冇咗，對話紀錄會冇晒，只有寫咗落 .md 嘅先留得低。所以第 3 步嘅交接筆記，一定要日日寫。

錦囊 3

放喺雲端電腦，去到世界邊度都攞到

點解：記憶 folder 放喺雲端電腦（VPS），24 小時開住。屋企電腦熄咗、去旅行，用手機都照樣叫 AI 讀到你嘅記憶。

雲端電腦要設一個唔易估嘅密碼，唔好用生日、123456
每個禮拜備份一份去 Dropbox／Google Drive，雲端電腦有咩事都唔怕

睇我實際點用

一個 Discord 對話，同時指揮 Claude、ChatGPT、Gemini，由剪片做到出 post

▶️ 睇 6 分鐘示範（YouTube）

想一步步跟住做？

雲端電腦點揀、點裝、點駁 AI，課程有齊

📩 DM 我「課程」，我帶你一步步做

唔使即刻決定，先問清楚啱唔啱你 🙌

⚠️ 公司機密、客人個人資料、密碼、API key 唔好寫入 .md 檔。
有問題直接 IG DM @roger_dsl。